یہ 7 دن کا سفر آپ کو سورۃ الملک کے ہر ہر حصے سے گزارے گا، جو قرآن کی سب سے اہم سورتوں میں سے ایک ہے۔ نبی اکرم ﷺ نے اس سورت کو اپنے قاری کے لئے شفاعت کرنے والی قرار دیا ہے یہاں تک کہ اس کے گناہ بخش دیے جائیں۔رسول اللہ ﷺ نے فرمایا: “هي المنجية من عذاب القبر” (جامع الترمذی 2890) یعنی یہ سورت قبر کے عذاب سے نجات دینے والی ہے۔اس ایک ہفتے میں آپ اللہ کی مطلق بادشاہت، زندگی اور موت کا مقصد، تخلیق کی کامل خوبصورتی، آخرت کی حقیقت اور اپنے روزمرہ کے رب پر انحصار کو سمجھیں گے۔ہفتے کے آخر تک آپ نہ صرف سورۃ الملک کے بڑے موضوعات کو سمجھیں گے بلکہ اس کی آیات سے متاثر ہوکر اپنے ایمان کو یقین میں اور یقین کو عمل میں بدلنے کے قابل ہوں گے، ان شاء اللہ۔<h3>موضوعات</h3><ul><li>اللہ کی تمام مخلوق پر کامل بادشاہت</li><li>زندگی اور موت کا اصل مقصد</li><li>تخلیق کی کامل نشانیاں</li><li>جہنم اور جنت کی حقیقت</li><li>اخلاص اور چھپی ہوئی عبادت</li><li>روزمرہ نعمتوں پر شکر ادا کرنا</li><li>پچھلی قوموں کے واقعات اور اسباق</li></ul>آج ہی سے وہ پہلا قدم بڑھائیں جو آپ کے دل کو ایمان کی مضبوط پناہ میں لے آئے۔ہمیں آپ کی رائے کا انتظار رہے گا: learningplans@quran.com پر ہمیں ای میل کریں

موضوع: اللہ کی کامل حاکمیت اور ملکیت کو پہچاننا
<h3>قرآنی آیات</h3>
<blockquote>
بہت ہی بابرکت ہے وہ ہستی جس کے ہاتھ میں بادشاہی ہے اور وہ ہرچیز پر قادر ہے۔ (الملک <a href="https://quran.com/67:1">67:1</a>)
</blockquote>
<blockquote>
جس نے موت اور زندگی کو پیدا کیا تاکہ تمہیں آزمائے کہ تم میں سے کون اچھے اعمال کرنے والا ہے۔ اور وہ بہت زبردست بھی ہے اور بہت بخشنے والا بھی۔(الملک <a href="https://quran.com/67:2">67:2</a>)
</blockquote>
<h3>تدبر و رہنمائی</h3>
سورۃ الملک کی ابتدائی آیات دل کو جھنجھوڑ دینے والے انداز میں اللہ کی بادشاہت بیان کرتی ہیں۔ جب اللہ فرماتا ہے کہ بادشاہی اسی کے ہاتھ میں ہے، تو یہ حقیقت ظاہر کی جا رہی ہے کہ ہر حکومت، ہر طاقت اور ہر فیصلہ اسی کے اختیار میں ہے۔ دنیاوی بادشاہ عارضی اور کمزور ہوتے ہیں لیکن اللہ کائنات کے ذرے ذرے کا مالک ہے۔
زندگی اور موت کا ذکر دراصل ایک بہت بڑی حقیقت یاد دلاتا ہے  کہ یہ سب کچھ آزمائش کے لئے ہے، تاکہ دیکھا جائے کون عمل میں بہترین ہے۔ یہاں معیار کی بات کی گئی ہے، مقدار کی نہیں۔ اخلاص اور سچائی کو تعداد پر ترجیح دی گئی۔
یہ زندگی گویا ایک ورکشاپ ہے، جہاں ہر نماز، ہر عمل اور ہر فیصلہ صرف اس کے معیار اور نیت کے حساب سے پرکھا جائے گا۔ لیکن خوش خبری یہ ہے کہ جس رب نے آزمائش رکھی ہے وہی بڑا مہربان اور بخشنے والا بھی ہے۔ وہ توبہ کے دروازے ہر وقت کھولے رکھتا ہے۔
نتیجہ سادہ ہے مگر زندگی بدل دینے والا ہے: ہم حادثاتی طور پر زندہ نہیں، نہ ہی موت اتفاق ہے۔ ہم ایک آزمائش میں ہیں، جو بادشاہوں کے بادشاہ نے حکمت اور رحمت کے ساتھ رکھی ہے۔ ہر لمحہ ہمارے لئے یا کامیابی کا ذریعہ ہے یا پلٹنے کا موقع۔
<h3>حدیث</h3>
سیدنا ابوہریرہ رضی اللہ عنہ نبی ﷺ سے بیان کرتے ہیں کہ آپ نے فرمایا :’’ قرآن کریم کی ایک سورت تیس آیتوں والی ، اپنے پڑھنے والے کے لیے سفارش کرے گی ، حتیٰ کہ اسے بخش دیا جائے گا ۔‘‘ ( مراد ہے ) ( تباركَ الذِي بيدِهِ المُلكُ ) (سنن ابو داؤد، حدیث 1400)
<h3>عملی سرگرمی</h3>
اب جب بھی آپ کو پریشانی یا بے بسی محسوس ہو تو سورۃ الملک کی تلاوت کریں اور رک کر یاد کریں کہ اللہ ہی ہر طاقت اور نتیجے کا مالک ہے۔ یہ سورت آپ کے حق میں سفارش کرے گی یہاں تک کہ آپ بخشے جائیں، اگر آپ اسے اپنا ساتھی بنا لیں۔
یہ کیسے مدد کرتی ہے:
<ul>
<li>پریشانی کو اعتماد میں بدل دیتی ہے</li>
<li>یاد دلاتی ہے کہ زندگی آزمائش ہے</li>
<li>دل کو اللہ کی بادشاہت سے جوڑتی ہے، لوگوں کی رضا سے نہیں</li>
<li>قیامت کے دن معافی کا ذریعہ بن سکتی ہے</li>
</ul>
<h3>دعا</h3>
<h2>لا إلهَ إلاّ اللّهُ وَاللّهُ أَكْبَـر، لا إلهَ إلاّ اللّهُ وحْـدَهُ، لا إلهَ إلاّ اللّهُ وحْـدَهُ لا شَريكَ لهُ، لا إلهَ إلاّ اللّهُ لهُ المُلكُ ولهُ الحَمْد، لا إلهَ إلاّ اللّهُ وَلا حَـوْلَ وَلا قُـوَّةَ إِلاّ بِالله</h2>
ترجمہ:
 اللہ کے سوا کوئی معبود نہیں، اللہ سب سے بڑا ہے۔ اللہ کے سوا کوئی معبود نہیں، وہ اکیلا ہے، اس کا کوئی شریک نہیں۔ بادشاہی اور حمد اسی کے لئے ہے۔ اللہ کے سوا کوئی معبود نہیں، اور نہ ہی کوئی طاقت ہے اور نہ ہی کوئی قوت مگر اللہ ہی سے۔
<h3>تدبر کا سوال</h3>
جب آپ سوچتے ہیں کہ زندگی، موت اور سارا اختیار اللہ کے ہاتھ میں ہے، تو یہ حقیقت آپ کے موجودہ مسائل کے بارے میں سوچنے کا انداز کس طرح بدل دیتی ہے ؟

بادشاہوں کا بادشاہ

موضوع: کائنات میں اللہ کے کامل نظام اور عظمت کو محسوس کرنا
<h3>قرآنی آیات</h3>
<blockquote>
(وہ اللہ کہ) جس نے بنائے سات آسمان ایک دوسرے کے اوپر۔ تم نہیں دیکھ پائو گے رحمن کی تخلیق میں کہیں کوئی فرق۔ پھر لوٹائو نگاہ کو کیا تمہیں کہیں کوئی رخنہ نظر آتا ہے ؟(الملک <a href="https://quran.com/67:3">67:3</a>)
</blockquote>
<blockquote>
پھر لوٹائو نگاہ کو بار بار (کوئی رخنہ ڈھونڈنے کے لیے) پلٹ آئے گی نگاہ تمہاری طرف ناکام تھک ہار کر۔ (الملک <a href="https://quran.com/67:4">67:4</a>)
</blockquote>
<h3>سبق اور تدبر</h3>
ان آیات میں اللہ ہماری توجہ آسمانوں کی طرف دلاتا ہے۔ بار بار دیکھنے کو کہتا ہے، گویا قرآن ہمیں چیلنج دیتا ہے: اپنی عقل، اپنی نگاہ، اپنی آزادی کے دعووں کو آزما کر دیکھولو۔ آسمان کو بار بار دیکھو، ترتیب میں نقص تلاش کرو، توازن میں خرابی ڈھونڈو، کسی ٹیڑھے پن کا سراغ لگاؤ۔
 لیکن تمہیں کوئی نہیں ملے گا۔ جس ذات نے ستاروں، کہکشاؤں، ہواؤں اور بارش کے قطروں کو بنایا، اس نے ایسی حکمت اور درستگی کے ساتھ بنایا جو انسانی سمجھ سے بالاتر ہے۔ سیاروں کے مدار سے لے کر پتے کی رگوں کے ڈیزائن تک، ہر چیز اپنے خالق کی مکمل کاریگری کی گواہی دیتی ہے۔
علما کہتے ہیں کہ یہاں &quot;خَاسِئًا&quot; اور &quot;حَسِيرًا&quot; کا مطلب ہے کہ انسان کی نگاہ عاجز اور تھکی ہوئی واپس آتی ہے، گویا شکست کھا کر پلٹتی ہے۔ انسان بار بار دیکھتا ہے مگر کوئی نقص نہیں ڈھونڈ پاتا۔
یہ کامل حسن اور توازن صرف آسمانوں اور کہکشاؤں میں نہیں، بلکہ تمہارے اپنے وجود میں بھی ہے: دل کی دھڑکن جو خود بخود چلتی ہے، سانس جو بغیر سوچے جاری رہتی ہے، زخم کا بھر جانا، زمین کا ایسا جھکاؤ جس پر زندگی ممکن ہو۔ یہ سب گواہی دیتے ہیں: یہ سب کچھ حادثہ نہیں بلکہ خالق، لطیف اور حکیم کی کاریگری ہے۔
یہ آیات ہمیں عاجزی سکھاتی ہیں۔ اگر تخلیق میں کوئی نقص نہیں تو پھر ہمارے حالات میں بھی اللہ کی حکمت بے عیب ہے، چاہے ہم نہ سمجھ سکیں۔ جس رب نے ستاروں کو اپنی جگہ تھام رکھا ہے وہ ہماری زندگی کو بھی سنبھال سکتا ہے۔
روحانی سبق: جب نگاہ یقین کے ساتھ تخلیق کو دیکھتی ہے تو ہر منظر اللہ کی قدرت اور کمال کی یاد دہانی بن جاتا ہے۔ اور جب ہم آسمانوں کے توازن پر اعتماد کرتے ہیں تو اپنی زندگی کے توازن پر بھی اللہ پر بھروسہ کرنا سیکھ لیتے ہیں۔
<h3>حدیث</h3>
رسول اللہ ﷺ نے فرمایا:
 ’ اللہ تعالیٰ نے آسمانوں اور زمین کو پیدا کرنے سے پچاس ہزار سال پہلے مخلوقات کی تقدیریں تحریر فرما دیں تھیں ۔ فرمایا : اور اس کا عرش پانی پر تھا ۔‘‘
 (صحیح مسلم، حدیث 2653)
یہ اس بات کی دلیل ہے کہ ہر تفصیل ازل سے اللہ کی حکمت کے مطابق طے شدہ ہے۔
<h3>عملی سرگرمی</h3>
آج چند لمحے آسمان کی طرف دیکھنے کے لئے نکالیے۔ چاہے وہ نیلا ہو، بادلوں سے ڈھکا ہو یا ستاروں سے بھرا ہوا — غور کیجیے کہ اس میں کوئی کمی نہیں۔ پھر خود کو یاد دلائیے: جس رب نے اس وسیع آسمان کو تھام رکھا ہے، وہی میری زندگی کو بھی سنبھالے ہوئے ہے۔
یہ کیسے مدد کرتی ہے
<ul>
<li>دل کو روزانہ اللہ کی نشانیاں دیکھنے کی عادت (تفكر)</li>
<li>اللہ پر کامل بھروسے (توکل) میں اضافہ</li>
<li>یادِ الٰہی کے ذریعے دل کو سکون ملتا ہے</li>
</ul>
<h3>دعا</h3>
<h2>رَبَّنَا مَا خَلَقْتَ هَـٰذَا بَـٰطِلًۭا سُبْحَـٰنَكَ فَقِنَا عَذَابَ ٱلنَّارِ</h2>
ترجمہ: اے ہمارے رب! تو نے یہ سب کچھ بے مقصد نہیں پیدا کیا، تو پاک ہے۔ پس ہمیں آگ کے عذاب سے بچا لے۔ (آلِ عمران <a href="https://quran.com/3:191">3:191</a>)
<h3>تدبر کا سوال</h3>
جب آپ اللہ کی تخلیق کی کامل کاریگری کو دیکھتے ہیں تو آپ کی ذاتی پریشانیاں اور شکوک اس کی قدرت اور حکمت کے مقابلے میں کس طرح چھوٹے لگنے لگتے ہیں؟

اس کی تخلیق کی کامل کاریگری

موضوع: ان لوگوں کا انجام جو اللہ کی نشانیاں جھٹلاتے ہیں
<h3>قرآنی آیات</h3>
<blockquote>
اور جو لوگ اپنے رب کا کفر کریں (چاہے وہ انسان ہوں یا جنات) ان کے لیے جہنم کا عذاب ہے اور وہ بہت ہی ُ برا ٹھکانہ ہے۔ (الملک <a href="https://quran.com/67:6">67:6</a>)
</blockquote>
<blockquote>
جب وہ اس میں جھونکے جائیں گے تو اسے سنیں گے دھاڑتے ہوئے اور وہ بہت جوش کھا رہی ہوگی۔ (الملک <a href="https://quran.com/67:7">67:7</a>)
</blockquote>
<blockquote>
قریب ہوگا کہ وہ غصے سے پھٹ جائے۔ جب بھی ڈالا جائے گا اس میں کسی ایک گروہ کو تو اس کے داروغے ان سے پوچھیں گے : کیا تمہارے پاس کوئی خبردار کرنے والا نہیں آیا تھا ؟ (الملک <a href="https://quran.com/67:8">67:8</a>)
</blockquote>
<h3>سبق اور تدبر</h3>
یہ آیات آخرت کا ایک نہایت سخت اور دل دہلا دینے والا منظر بیان کرتی ہیں۔ ان لوگوں کے لئے جو جان بوجھ کر اللہ، اس کے رسولوں اور اس کے پیغام کو جھٹلاتے ہیں۔ جہنم کو دہاڑتے ہوئے، جوش مارتے ہوئے اور غصے سے پھٹنے کے قریب بتایا گیا ہے۔ یہ کوئی قصہ کہانی نہیں بلکہ ربِ کائنات کی طرف سے حقیقی وارننگ ہے کہ یہ سب حقیقت ہے اور قریب ہے۔
داروغوں (جہنم کے فرشتوں) کا سوال &quot;کیا تمہارے پاس کوئی ڈرانے والا نہیں آیا تھا؟&quot; مجرموں کو ان کی اپنی کوتاہی کا اعتراف دلانے کے لئے ہوگا۔ کوئی یہ نہیں کہہ سکے گا کہ انہیں خبر نہ تھی۔ رسول آئے، قرآن اترا، اذانیں گونجتی رہیں، دوستوں کی نصیحتیں سنائی دیتی رہییی، اور دل میں ضمیر کی سرگوشیاں بھی موجود تھیں۔
المیہ یہ نہیں کہ علم نہیں تھا، بلکہ وجہ یہ ہے کہ پرواہ نہ کی گئی۔ سنا مگر عمل نہ کیا، دیکھا مگر منہ موڑ لیا۔ دنیا میں وارننگ کو نظر انداز کرنے سے مال یا صحت کا نقصان ہو سکتا ہے۔ لیکن آخرت میں اللہ کی وارننگ کو نظر انداز کرنا ہمیشہ کی کامیابی سے محرومی کا باعث ہے۔
پھر بھی ان آیات میں رحمت چھپی ہے۔ یہ ہمیں آج سنائی جا رہی ہیں، جبکہ توبہ کا دروازہ کھلا ہے۔ اگر دل میں ڈر پیدا ہو تو یہ اللہ کی طرف سے تحفہ ہے، کیونکہ موت سے پہلے کا خوف موت کے بعد کے عذاب سے بچنے کا ذریعہ ہے۔ اصل خطرہ یہ ہے کہ دل بالکل بے حس نہ ہو جائیں۔
روحانی سبق: جہنم کوئی خیالی بات نہیں بلکہ حقیقی انجام ہے۔ اللہ ہمیں دنیا ہی میں خبردار کرتا ہے تاکہ کوئی یہ نہ کہہ سکے کہ اطلاع نہیں تھی۔ وہ کسی پر اچانک عذاب نہیں کرتا، بلکہ پلٹنے کا پورا موقع دیتا ہے۔
<h3>حدیث</h3>
رسول اللہ ﷺ نے فرمایا :’’ جنت گراں امور میں گھری ہوئی ہے اور دوزخ خواہشات نفسانی میں گھری ہوئی ہے ۔‘‘
 (صحیح مسلم، حدیث 2822)
یعنی جہنم کے گرد ایسی لذتیں اور خواہشات ہیں جن کے دھوکے میں بہت سے لوگ پڑ جاتے ہیں، جبکہ جنت کے گرد مشکلات ہیں جنہیں برداشت کرنے کے بعد ہی اندر کی ابدی کامیابی نصیب ہوتی ہے۔
<h3>عملی سرگرمی</h3>
آج اپنے کسی ایک گناہ کو (چاہے چھوٹا ہی کیوں نہ ہو) اللہ کی خاطر چھوڑ دیجیے۔ دل میں سچے دل سے کہیے:
 &quot;اے اللہ! میں یہ کام چھوڑتا ہوں کیونکہ میں تیرے غضب سے ڈرتا ہوں اور تیری رحمت کی امید رکھتا ہوں۔&quot;
یہ کیسے مدد کرتا ہے
<ul>
<li>خوف کو عمل میں بدل دیتا ہے۔</li>
<li>نفس پر قابو کو گہرا کرتا ہے</li>
<li>دل کو مغفرت کی طلب میں جھکا دیتا ہے</li>
</ul>
<h3>دعا</h3>
<h2>اللَّهُمَّ أَجِرْنِي مِنَ النَّارِ</h2>
ترجمہ: اے اللہ ! مجھے جہنم کی آگ سے محفوظ رکھ ۔‘‘
 (سنن ابی داؤد، حدیث 5079)
<h3>تدبر کا سوال</h3>
اگر آج جہنم کے فرشتے آپ سے پوچھیں: &quot;کیا تمہارے پاس کوئی ڈرانے والا نہیں آیا تھا؟&quot;
 تو آپ اپنی زندگی سے کیا جواب دے سکیں گے؟

وہ وارننگ جسے نظر انداز نہیں کیا جا سکتا

موضوع: اہلِ ایمان کے لئے رب کی دانائی ، مہربانی اور محبت
<h3>قرآنی آیات</h3>
<blockquote>
بیشک وہ لوگ جو اپنے رب سے ڈرتے ہیں غیب میں رہتے ہوئے ان کے لیے مغفرت بھی ہے اور بہت بڑا اجر بھی (الملک <a href="https://quran.com/67:12">67:12</a>)
</blockquote>
<blockquote>
اور (دیکھو !) چاہے تم اپنی بات کو چھپا کر بیان کرو یا بلند آواز سے بیان کرو (وہ اس کو جانتا ہے)۔ وہ تو اس سے بھی واقف ہے جو تمہارے سینوں کے اندر پنہاں ہے۔ (الملک <a href="https://quran.com/67:13">67:13</a>)
</blockquote>
<blockquote>
کیا وہی نہ جانے گا جس نے پیدا کیا ہے ؟ اور وہ بہت باریک بین ہے ہر شے کی خبر رکھنے والا ہے۔(الملک <a href="https://quran.com/67:14">67:14</a>)
</blockquote>
<h3>سبق اور تدبر</h3>
جہنم کے ہولناک مناظر کے بعد، اللہ ایک دوسری جماعت کی طرف ہماری توجہ دلاتے ہے: وہ جو اس سے بن دیکھے ڈرتے ہیں۔ یہ وہ دل ہیں جو اللہ کے ذکر سے زندہ ہیں، چاہے کوئی اور دیکھ رہا ہو یا نہ ہو۔ ان کے لئے دو عظیم بشارتیں ہیں: گناہوں کی مغفرت اور جنت کا انعام۔
یہ خوف دہشت زدہ کر دینے والا نہیں، بلکہ محبت اور شعور سے پیدا ہونے والا ادب ہے۔ ایک مومن کی یہ تمنا کہ وہ اپنے رب کو ناراض نہ کرے۔ یہ احساس کہ اللہ ہر وقت اور ہر جگہ ساتھ ہے ۔بازار میں بھی، گھر میں بھی، زبان پر کہے ہوئے الفاظ میں بھی اور دل میں چھپے ارادوں میں بھی۔
آیت 13 یاد دلاتی ہے کہ کوئی سوچ اتنی چھوٹی نہیں کہ اللہ کے علم سے چھپ جائے۔ دل کے اندر کے ارادے، کینے، محبتیں اور امیدیں سب اسی کے سامنے ہیں۔ اگر نیت خراب ہو تو یہ بات خوف پیدا کرتی ہے، لیکن اگر نیت پاکیزہ ہو اور لوگ غلط سمجھ لیں تو یہی بات دل کو سکون دیتی ہے، کیونکہ اصل جاننے والا اللہ ہے۔
آیت 14 میں اللہ پوچھتا ہے: &quot;کیا وہ اپنی ہی مخلوق کو نہ جانے گا؟&quot; یعنی انسان بھول جاتا ہے، ورنہ اللہ کی قدرت کامل ہے۔ جس نے آسمانوں کو بے نقص بنایا اور انسان کے خلیے کو حسن و ترتیب کے ساتھ تخلیق کیا، وہی دل کے حال کو بھی جانتا ہے۔ وہ &quot;لطیف&quot; ہے  تمہاری چھوٹی سے چھوٹی آزمائش کے باریک پہلو سے واقف، اور &quot;خبیر&quot; ہے  تمہارے ہر حال اور ہر مشکل سے پوری طرح باخبر۔
روحانی سبق: تم کبھی اکیلے نہیں ہو۔ صبر کا ہر چھپا لمحہ، دعا کا ہر خاموش لفظ، جدوجہد کی ہر گمنام کیفیت اُس کے علم میں ہے جو تمہیں تم سے بھی زیادہ جانتا ہے۔ اور وہ اسی کے مطابق بدلہ دیتا ہے۔
<h3>حدیث</h3>
رسول اللہ ﷺ نے فرمایا:
 “االلہ تعالیٰ تمہارے جسموں کو دیکھتا ہے نہ تمہاری صورتوں کو لیکن وہ تمہارے دلوں کی طرف دیکھتا ہے ۔”
 (صحیح مسلم، حدیث 2564)
<h3>عملی سرگرمی</h3>
آج ایک ایسا نیک عمل کریں جو کسی کو معلوم نہ ہو۔ ایسا عمل جو صرف آپ اور اللہ کے درمیان ہو، اور نیت کریں کہ یہ صرف اس کی رضا کے لئے ہے۔
یہ کیسے مدد کرتا ہے
<ul>
<li>نیت کے چراغ کو روشن کردیتا ہے</li>
<li>بندے اور رب کے درمیان تعلق کو بڑھا دیتا ہے</li>
<li>دل کو صرف اللہ کے لیے خاص کردیتا ہے</li>
</ul>
<h3>دعا</h3>
<h2>اللَّهُمَّ اجعل سريرتي خيرًا من علانيتي</h2>
ترجمہ: اے اللہ! میری پوشیدہ حالت کو میری ظاہر حالت سے بہتر بنا دے۔
<h3>تدبر کا سوال</h3>
جب آپ کو یاد آتا ہے کہ اللہ آپ کے دل کے سب سے چھپے ہوئے رازوں کو بھی جانتا ہے، تو آپ کے دن گزارنے کے انداز میں کیا تبدیلی آتی ہے؟

وہ جو تمہیں سب سے بہتر جانتا ہے

موضوع: اللہ کے عطا کردہ رزق کو پہچاننا اور اپنی مکمل محتاجی کا احساس کرنا
<h3>قرآنی آیات</h3>
<blockquote>
وہی ہے جس نے تمہارے لیے بنا دیا ہے زمین کو پست تو تم چلو پھرو اس کے کندھوں کے مابین اور اس کے (دیے ہوئے) رزق سے کھائو پیو اور (یاد رکھو کہ تم نے) اسی کی طرف زندہ ہو کر جانا ہے۔ (الملک <a href="https://quran.com/67:15">67:15</a>)
</blockquote>
<blockquote>
کیا تم بےخوف ہوگئے ہو اس سے جو آسمان میں ہے کہ وہ تمہیں زمین میں دھنسا دے اور وہ یکایک لرزنے لگے۔ (الملک <a href="https://quran.com/67:16">67:16</a>)
</blockquote>
<blockquote>
کیا تم بےخوف ہوگئے ہو اس سے جو آسمان میں ہے کہ وہ تم پر پتھر برسانے والی آندھی بھیج دے ؟ پھر تمہیں معلوم ہوجائے گا کہ میرا خبردار کرنا کیسا تھا ! (الملک <a href="https://quran.com/67:17">67:17</a>)
</blockquote>
<h3>سبق اور تدبر</h3>
اللہ ہمیں ایک ایسی حقیقت یاد دلاتا ہے جو اتنی بنیادی ہے کہ اکثر ہم بھول جاتے ہیں: وہ زمین جس پر ہم کھڑے ہیں۔ یہ زمین ہماری انجینئرنگ یا سائنس کی وجہ سے نہیں بلکہ اللہ کے حکم سے ہمارے لئے پرسکون اور قائم ہے۔ ہمارا ہر قدم، ہر سفر اور ہر نوالہ اللہ کے قائم کردہ توازن کی وجہ سے ممکن ہے۔
آیت 15 ہمیں یہ توازن سکھاتی ہے: اللہ کی نعمتوں سے فائدہ اٹھاؤ مگر یاد رکھو کہ انجام کار سب کو اسی کے پاس لوٹنا ہے۔ یہی مومن کا توازن ہے: شکرگزاری کے ساتھ لطف اندوز ہونا لیکن غفلت میں نہ پڑنا، اور رزق کھانا لیکن تکبر کے بغیر۔
پھر اللہ دو سخت سوالات کرتا ہے: کیا تم مطمئن ہو کہ زمین تمہیں نگل نہ لے؟ کیا تم بے فکر ہو کہ پتھروں کی بارش تم پر نہ برسائی جائے؟ یہ محض پچھلی قوموں کے قصے نہیں بلکہ ہمارے لئے تنبیہ ہیں۔ زمین آج اس لئے پرسکون ہے کہ اللہ نے حکم دیا ہے۔ اگر وہ چاہے تو لمحوں میں اسے ہلا دے یا پھاڑ دے۔ ہماری سلامتی ہمارا حق نہیں بلکہ ہر دن ایک عطیہ ہے۔
یوں سمجھئے جیسے آپ جہاز میں سفر کر رہے ہوں — آپ کیبن میں چہل قدمی کرتے ہیں، کھانا کھاتے ہیں، آرام کرتے ہیں، اور بھول جاتے ہیں کہ آپ کی جان پوری طرح اُس کے اختیار میں ہے جو پرواز کا کنٹرول سنبھالے ہوئے ہے۔ اللہ کی مثال سب سے بلند ہے  ہم اسی کی زمین پر ویسے ہی جی رہے ہیں، گویا پرسکون، مگر اصل میں لمحہ بہ لمحہ اس کی رحمت پر قائم ہیں۔
روحانی سبق: جب ہم اپنی محتاجی کو پہچانتے ہیں تو شکر گزاری گہری ہو جاتی ہے۔ ہم چلتے، کھاتے اور سانس لیتے ہیں اس لئے نہیں کہ دنیا خود چل رہی ہے بلکہ اس لئے کہ اللہ ہر لمحہ ہمیں اور دنیا کو قائم رکھے ہوئے ہے۔
<h3>حدیث</h3>
رسول اللہ ﷺ نے فرمایا:
 جس کی صبح اس حال میں ہوئی کہ اسے بدن میں عافیت ، اپنے بارے میں امن اور دن بھر کی خوراک حاصل ہو ، اسے گویا پوری دنیا جمع کر کے دے دی گئی ۔‘‘
 (سنن ابن ماجہ، حدیث 4141)
<h3>عملی سرگرمی</h3>
آج جب بھی کھانے کے لئے بیٹھیں تو چند لمحے رک کر سوچیں: یہ کھانا مجھ تک صرف اس لئے پہنچا ہے کہ اللہ نے زمین سے اسے اگنے دیا، ہاتھوں سے اسے تیار کروایا اور مجھے موقع دیا کہ میں کھاؤں۔ پھر دل سے *&quot;الحمد للہ&quot;) کہیے۔
یہ کیسے مدد کرتا ہے
<ul>
<li>شکرگزاری میں گہرائی پیدا کرتا ہے</li>
<li>یاد دلاتا ہے کہ کوئی چیز “عام” نہیں ہے</li>
<li>کھانے کو بھی عبادت بنا دیتا ہے</li>
</ul>
<h3>دعا</h3>
<h2>الْحَمْدُ لِلَّهِ الَّذِي أَطْعَمَنِي هَذَا وَرَزَقَنِيهِ مِنْ غَيْرِ حَوْلٍ مِنِّي وَلَا قُوَّةٍ</h2>
ترجمہ: تمام تعریفیں اللہ کے لئے ہیں جس نے مجھے یہ کھلایا اور عطا کیا، بغیر اس کے کہ مجھ میں کوئی طاقت یا قدرت ہو۔
 (حصن المسلم، حدیث 180)
<h3>تدبر کا سوال</h3>
اگر اللہ صرف ایک نعمت بھی واپس لے لے جسے آپ روز مرہ میں معمولی سمجھتے ہیں، تو آپ کی زندگی کس طرح بدل جائے گی؟

تمہارے قدموں کے نیچے کی زمین

موضوع: ان قوموں کے انجام سے سیکھنا جنہوں نے ہدایت کو جھٹلایا
<h3>قرآنی آیات</h3>
<blockquote>
اور یقینا ان سے پہلے والوں نے بھی جھٹلایا تھا تو کیسا ہوا (ان پر) میرا عذاب ؟  (الملک <a href="https://quran.com/67:18">67:18</a>)
</blockquote>
<blockquote>
کیا یہ لوگ دیکھتے نہیں پرندوں کو اپنے اوپر (اڑتے ہوئے) کبھی پروں کو پھیلائے ہوئے اور کبھی سمیٹے ہوئے ؟ نہیں روکے ہوئے انہیں کوئی (فضا میں) مگر رحمن ! یقینا وہ ہرچیز کو خوب دیکھنے والا ہے ! (الملک <a href="https://quran.com/67:19">67:19</a>)
</blockquote>
<blockquote>
بھلا وہ کون ہے جو تمہارا لشکر بن کر تمہاری مدد کرے رحمن کے مقابلہ میں ؟ نہیں ہیں یہ کافر مگر دھوکے میں مبتلا ہیں  (الملک <a href="https://quran.com/67:20">67:20</a>)
</blockquote>
<h3>سبق اور تدبر</h3>
یہ آیات تاریخ کا سبق اور حقیقت کی یاد دہانی دونوں ہیں۔ اللہ ہمیں بتاتا ہے کہ ہم اس کے پیغام کو سننے والے پہلے لوگ نہیں۔ ہم سے پہلے ایسی قومیں گزر چکیں  ہیں جو طاقت میں ہم سے کہیں بڑھ کر تھیں۔ ان کے محلات اب مٹی ہو گئے، ان کی فوجیں بکھر گئیں، ان کے نام بس پتھروں پر نقش ہیں جنہیں آج سیاح تصویریں بنا کر دیکھتے ہیں۔ ان کی طاقت اور دولت انہیں اللہ کے عذاب سے نہیں بچا سکی۔ بلکہ تکبر اور حق کے انکار نے انہیں جلد ہلاک کر دیا۔
پیغام بالکل واضح ہے: اگر اللہ نے ان کے غرور پر گرفت کی تو ہم کیسے نجات حاصل کر سکتے ہیں؟ پچھلی قوموں کے کھنڈرات محض سیاحت کی جگہیں نہیں بلکہ زمین پر اللہ کی تنبیہ ہیں۔
پھر اللہ ہماری نظر آسمان کی طرف موڑتا ہے، پرندے کی پرواز کی طرف۔ ہر بازو کا جھپٹنا اور کھلنا ایک معجزہ ہے۔ زمین کی کشش انہیں نیچے گرنے پر مجبور کرتی، مگر وہ اللہ کے حکم سے ہوا میں قائم رہتے ہیں۔ یہی حقیقت ہماری زندگی پر بھی لاگو ہوتی ہے۔ ہماری سلامتی، کامیابی اور بقا سب اللہ کے سہارے سے ہے۔ اگر ایک لمحے کے لئے بھی وہ سہارا اٹھا لے تو سب کچھ ختم ہو جائے۔
آخر میں اللہ ایک جھوٹے یقین کو توڑتا ہے: یہ گمان کہ اللہ کے علاوہ کوئی ہمیں بچا سکتا ہے۔ لشکر، دولت، تعلقات یہ سب صرف اس کے حکم کے تابع ہیں، بذاتِ خود کچھ بھی نہیں۔ ان پر بھروسہ کرنا حقیقت نہیں بلکہ دھوکا ہے۔
روحانی سبق: عقلمند وہ ہے جو ماضی کی بربادی دیکھ کر حال کو سنوارتا ہے۔ ہم قائم ہیں اپنی طاقت سے نہیں بلکہ اللہ کی رحمت سے۔ جیسے پرندہ نظر نہ آنے والی قوت کے سہارے فضا میں رہتا ہے، ویسے ہی ہم بھی ہر لمحہ اللہ کی پکڑ اور رحمت کے بیچ قائم ہیں۔
<h3>حدیث</h3>
رسول اللہ ﷺ نے فرمایا:
 “اس شخص کی مثال جو اپنے رب کو یاد کرتا ہے اور اس کی مثال جو اپنے رب کو یاد نہیں کرتا زندہ اور مردہ جیسی ہے ۔“”
 (صحیح بخاری، حدیث 6407؛ صحیح مسلم، حدیث 779)
<h3>عملی سرگرمی</h3>
جب بھی آپ کسی پرندے کو پرواز میں دیکھیں تو چند لمحے رک کر سوچیں: یہ اللہ ہے جو اسے تھامے ہوئے ہے، اور وہی مجھے بھی ہر لمحہ تھامے ہوئے ہے۔ اس سوچ کو دل میں شکر اور عاجزی پیدا کرنے دیں۔
یہ کیسے مدد کرتا ہے
<ul>
<li>عام مناظر کو روحانی یاد دہانی میں بدل دیتا ہے</li>
<li>اللہ پر توکل کو مضبوط کرتا ہے</li>
<li>تکبر سے بچاتا ہے</li>
</ul>
<h3>دعا</h3>
<h2>يَا حَيُّ يَا قَيُّومُ، بِرَحْمَتِكَ أَسْتَغِيثُ، أَصْلِحْ لِي شَأْنِي كُلَّهُ، وَلَا تَكِلْنِي إِلَى نَفْسِي طَرْفَةَ عَيْنٍ</h2>
ترجمہ: اے ہمیشہ زندہ رہنے والے، اے سب کو قائم رکھنے والے! میں تیری رحمت کے سہارے مدد مانگتا ہوں۔ میرے سارے معاملات درست کر دے اور مجھے ایک لمحے کے لئے بھی میرے نفس کے حوالے نہ کر۔
 (حصن المسلم، دعا 88)
<h3>تدبر کا سوال</h3>
جب آپ پچھلی قوموں کی بربادی پر غور کرتے ہیں تو اپنی زندگی میں کون سی تبدیلیاں کرنا چاہیں گے تاکہ ان کے انجام سے بچے رہیں؟

کھنڈرات میں لکھے اسباق

موضوع: آخری پکار پلٹ آؤ اس سے پہلے کہ دیر ہو جائے
<h3>قرآنی آیات</h3>
<blockquote>
وہ کہتے ہیں کب پورا ہوگا یہ وعدہ ؟ اگر تم سچے ہو (تو بتائو) ! (الملک <a href="https://quran.com/67:25">67:25</a>)
</blockquote>
<blockquote>
کہہ دیجیے کہ یہ علم تو اللہ ہی کے پاس ہے اور میں تو بس ایک واضح طور پر خبردار کردینے والا ہوں۔ (الملک <a href="https://quran.com/67:26">67:26</a>)
</blockquote>
<blockquote>
آپ ﷺ کہیے کہ ذرا سوچو ! اگر تمہارا پانی گہرائی میں اتر جائے تو کون ہے جو لائے گا تمہارے پاس صاف نتھرا ہواپانی ؟ (الملک <a href="https://quran.com/67:30">67:30</a>)
</blockquote>
<h3>سبق اور تدبر</h3>
ان آخری آیات میں اللہ کافروں کے عام رویے کو بیان کرتا ہے: آخرت کی وارننگ کا مذاق اُڑانا۔ وہ کہتے ہیں: &quot;یہ کب ہوگا؟&quot; گویا اللہ کو چیلنج کر رہے ہوں۔ یہ سوال تجسس سے نہیں بلکہ تکبر اور انکار سے پیدا ہوتا ہے۔
اللہ اپنے نبی ﷺ کو ہدایت دیتا ہے کہ سادہ جواب دیں: اس کا علم صرف اللہ کے پاس ہے۔ یہی ایک بنیادی سچائی ہے۔ کچھ علم ہم سے چھپا کر رکھا گیا ہے ہماری اپنی بھلائی کے لئے۔ اگر ہمیں موت یا قیامت کے عین وقت کا علم ہوتا تو ہمارے اعمال مصنوعی یا آخری وقت کے انتظار پر مبنی ہو جاتے۔ یہی بے یقینی اللہ کی رحمت ہے تاکہ ہم ہر دن سنجیدگی اور اخلاص کے ساتھ جیئیں۔
سورۃ کا اختتام ایک تیز سوال پر ہوتا ہے: اگر تمہارا پانی زمین میں گہرائی تک کھو جائے تو کون ہے جو اسے واپس بہا دے؟ پانی زندگی ہے۔ ہم روز پیتے ہیں مگر کبھی سوچتے نہیں کہ یہ صرف اللہ کے حکم سے ہمارے پاس ہے۔ پیغام بالکل صاف ہے: اگر ہم ایک گھونٹ پانی کے مالک نہیں تو اللہ کو نظر انداز کرنے کی جرات کیسے کر سکتے ہیں؟
یہی وہ مقام ہے جہاں سورۃ الملک ہمیں دو حقیقتوں کے بیچ چھوڑتی ہے: اللہ کا وعدہ یقینی ہے، اور ہم اس پر کہیں زیادہ محتاج ہیں جتنا ہم ماننا چاہتے ہیں۔ اس احساس کے بعد عقل مندی یہی ہے کہ دیر ہونے سے پہلے خلوص دل سے اللہ کی طرف پلٹ آئیں۔
روحانی سبق: اگر تم یہ جاننا چاہتے ہو کہ تم کس قدر اللہ پر منحصر ہو تو سوچو: صرف ایک نعمت روک دینا، جیسے پانی، زندگی کو روک سکتا ہے۔ اللہ پر انحصار کمزوری نہیں بلکہ حقیقت ہے۔ اور اس حقیقت کو ماننا ہی حکمت کی ابتدا ہے۔
<h3>حدیث</h3>
رسول اللہ ﷺ نے فرمایا:
 “پانچ چیزوں کو پانچ سے پہلے غنیمت سمجھو: اپنی جوانی کو بڑھاپے سے پہلے، اپنی صحت کو بیماری سے پہلے، اپنے مال کو تنگدستی سے پہلے، اپنے خالی وقت کو مشغولی سے پہلے، اور اپنی زندگی کو موت سے پہلے۔”
 (شعب الایمان للبیہقی، حدیث 10250)
<h3>عملی سرگرمی</h3>
آج جب پانی پیو تو پہلے گھونٹ سے پہلے چند لمحے رک کر دل سے کہو: الحمد للہ۔ اسے یاد دہانی بناؤ کہ ہر قطرہ اللہ کی طرف سے ہے۔ اور وہی رب جو آج تمہاری پیاس بجھاتا ہے، اگر تم اس کی طرف پلٹو گے تو کل آخرت میں تمہاری روح کو بھی اپنی رحمت سے سیراب کرے گا۔
یہ کیسے مدد کرتی ہے
<ul>
<li>روزمرہ کی نعمتوں میں شعور اور شکر پیدا کرتا ہے</li>
<li>تکبر کو شکرگزاری میں بدل دیتا ہے</li>
<li>دل کو ہر وقت اللہ کی موجودگی سے بیدار رکھتا ہے</li>
</ul>
<h3>دعا</h3>
كانَ رسولُ اللَّهِ ﷺ يدعو:
 اللَّهُمَّ أحسِن عاقبتَنا في الأمورِ كلِّها وأجِرنا مِن خِزيِ الدُّنيا وعذابِ الآخرةِ
ترجمہ: اے اللہ! ہمارے تمام معاملات کا انجام اچھا فرما اور ہمیں دنیا کی رسوائی اور آخرت کے عذاب سے بچا لے۔
 (مسند احمد، حدیث 17628)
<h3>تدبر کا سوال</h3>
اگر آپ کو یقین ہو جائے کہ اللہ کا وعدہ کسی بھی لمحے پورا ہو سکتا ہے، تو آج آپ اپنی زندگی میں کیا تبدیلی کریں گے؟
<h2>اختتامیہ اور آئندہ کے لئے رہنمائی</h2>
سورۃ الملک کا آغاز اللہ کی کامل بادشاہت کے اعلان سے ہوتا ہے اور اختتام ایک سادہ مگر جھنجھوڑ دینے والے سوال پر ہوتا ہے: پانی کے بارے میں  یہ یاد دہانی کہ اللہ کی بے عیب تخلیق کے نقشے سے لے کر آخرت کی بڑی حقیقتوں تک، اور ان چھوٹی بوندوں تک جو ہم پیتے ہیں، ہر چیز کا سنبھالنے والا اور کنٹرول رکھنے والا صرف اللہ ہی ہے۔
<h3>ان 7 دنوں کے دوران آپ کو یاد دلایا گیا کہ:</h3>
<ul>
<li>زندگی ایک بامقصد آزمائش ہے، اور اللہ کے نزدیک اخلاص دکھاوے سے بہتر ہے۔</li>
<li>کائنات میں کوئی نقص نہیں کیونکہ اس کا خالق سب سے بلند اور کامل ہے۔</li>
<li>جہنم حقیقت ہے، لیکن اللہ کی رحمت بھی حقیقت ہے، اور اس کا دروازہ آج بھی کھلا ہے۔</li>
<li>اللہ آپ کی چھپی نیتوں کو بھی جانتا ہے اور آپ کے چھپے اعمال پر بھی اجر دیتا ہے۔</li>
<li>آپ کی ہر نعمت اللہ کے حکم سے قائم ہے۔</li>
<li>پچھلی قوموں کی تاریخ محض پڑھنے کے لئے نہیں بلکہ سبق لینے کے لئے ہے۔</li>
<li>آپ ہر لمحہ اللہ کے محتاج ہیں، اور یہی محتاجی عاجزی اور امید دونوں کا سبب ہے۔</li>
</ul>
<h3>لمبے عرصے کے لئے مستقل مزاجی کے نکات:</h3>
<ul>
<li>قرآن سے روزانہ جڑے رہیں، چاہے چند منٹ ہی کیوں نہ ہوں۔ سورۃ الملک کو بار بار دہرائیں۔ نبی ﷺ اسے روز رات کو پڑھا کرتے تھے۔ (جامع ترمذی 2892)</li>
<li>نیک صحبت اختیار کریں جو آپ کو اللہ کی یاد دلائے اور آپ کے دل کو زندہ رکھے۔</li>
<li>اخلاص کی حفاظت کریں: ایسے نیک عمل کریں جو صرف آپ اور اللہ کے درمیان ہوں۔</li>
<li>اپنی نیت کو بار بار پرکھا کریں؛ معمولی عمل بھی درست نیت سے عبادت بن جاتے ہیں۔</li>
<li>سورۃ الملک کے ساتھ گہری مشغولیت پیدا کریں۔ یہ سورت سوالات سے بھری ہوئی ہے۔</li>
</ul>
اس سورت کی خاص بات یہ ہے کہ صرف تیس آیات پر مشتمل ہونے کے باوجود اس میں دس سے زیادہ سوالات ہیں، اور یہ سب عقیدے کے اہم پہلوؤں سے متعلق ہیں: اللہ کی تخلیق، اس کا علم، اس کی قدرت، رزق میں حفاظت، تباہی اور نجات۔
اللہ فرماتا ہے: “کیا تم بےخوف ہوگئے ہو اس سے جو آسمان میں ہے کہ وہ تمہیں زمین میں دھنسا دے اور وہ یکایک لرزنے لگے۔” – کیا واقعی تم اللہ کے عذاب سے محفوظ ہو؟
اللہ فرماتا ہے: “بھلا وہ کون ہے جو تمہارا لشکر بن کر تمہاری مدد کرے رحمن کے مقابلہ میں ؟ نہیں ہیں یہ کافر مگر دھوکے میں مبتلا ہیں۔” – تمہیں مدد دینے والا کون ہے؟
اللہ فرماتا ہے: “پھر بھلا کون ہے وہ جو تمہیں رزق دے سکے اگر اللہ اپنے رزق کو روک لے ؟ بلکہ یہ لوگ اپنی سرکشی اور حق سے گریز میں بہت آگے بڑھ گئے ہیں۔” – تمہارا رازق کون ہے؟ اگر رزق روک لیا جائے تو کیا کرو گے؟
اللہ فرماتا ہے: “آپ ﷺ کہیے کہ ذرا سوچو ! اگر تمہارا پانی گہرائی میں اتر جائے تو کون ہے جو لائے گا تمہارے پاس صاف نتھرا ہواپانی ؟” – ایک گھونٹ پانی تک پر تمہارا اختیار نہیں۔
یوں لگتا ہے جیسے یہ سوالات سونے سے پہلے آپ کے عقیدے کا ایک جامع جائزہ بن جاتے ہیں۔ دن کے وقت شیطان آپ کو شبہات اور جھوٹے عقائد میں الجھا دیتا ہے۔ آپ کے دل میں یہ خیال آتا ہے کہ اگر کوئی مشکل پیش آئی تو فلاں شخص آپ کو بچا لے گا، یا فلاں آپ کا رزق فراہم کرے گا، یا آپ کی حاجت پوری کرے گا۔ لیکن پھر نیند سے پہلے یہ سورہ آپ کے سامنے آتی ہے — عقیدے کے ایک جائزے کے طور پر — تاکہ آپ اسی فطرت (فِطرہ) پر سوئیں جس پر آپ کو پیدا کیا گیا تھا۔
یہ سوالات، جو یہ سورہ آپ کے سامنے پیش کرتی ہے جب آپ بستر پر اکیلے لیٹے ہوتے ہیں، آپ کو پکارتے ہیں کہ آپ اپنی بینائی سے دیکھیں، اپنی سماعت سے سنیں، اور اپنی عقل سے غور و فکر کریں:
*“پھر لوٹائو نگاہ کو بار بار (کوئی رخنہ ڈھونڈنے کے لیے) پلٹ آئے گی نگاہ تمہاری طرف ناکام تھک ہار کر۔”
 “کیا تمہارے پاس کوئی خبردار کرنے والا نہیں آیا تھا ؟”
 “کیا وہی نہ جانے گا جس نے پیدا کیا ہے ؟ اور وہ بہت باریک بین ہے ہر شے کی خبر رکھنے والا ہے۔”
 “کیا یہ لوگ دیکھتے نہیں پرندوں کو اپنے اوپر (اڑتے ہوئے)”
 “تو کیا وہ شخص جو اپنے منہ کے بل گھسٹ رہا ہے زیادہ ہدایت پر ہے یا وہ جو سیدھا ہو کر چل رہا ہے ایک سیدھے راستے پر ؟”
یوں یہ سورہ نیند سے پہلے آپ کے تمام حواس اور صلاحیتوں کو متحرک کر دیتی ہے، تاکہ آپ اللہ اور غیب پر اپنے ایمان کا از سرِ نو جائزہ لے سکیں۔ یہی وجہ ہے کہ نبی اکرم ﷺ رات کو سونے سے پہلے سورۃ السجدہ (32) اور سورۃ الملک (67) پڑھنے کے بغیر نہیں سوتے تھے جیسا کہ درج ذیل حدیث میں آیا ہے:
 عَنْ جَابِرٍ، أَنَّ النَّبِيَّ ﷺ كَانَ لاَ يَنَامُ حَتَّى يَقْرَأَ ‏: ‏ ‏(‏الم * تَنْزِيلُ ‏)‏ وَ ‏(‏ تَبَارَكَ الَّذِي بِيَدِهِ الْمُلْكُ)
جابر بن عبداللہ رضی اللہ عنہ سے روایت ہے کہ رسول اللہ ﷺ سونے سے پہلے سورۃ السجدہ اور سورۃ الملک کی تلاوت ضرور کیا کرتے تھے۔
 (جامع ترمذی 2892؛ الأدب المفرد 1209؛ سنن الدارمی 3316)
سب سے بڑھ کر یاد رکھیں:
 آپ کا ہر خلوص پر مبنی قدم، چاہے کتنا ہی چھوٹا کیوں نہ ہو، اللہ کے ہاں دیکھا جاتا ہے اور محبوب ہے۔
<h2>سب سے بڑھ کر یاد رکھیں:</h2>
آپ کا ہر خلوص پر مبنی قدم، چاہے کتنا ہی چھوٹا کیوں نہ ہو، اللہ کے ہاں دیکھا جاتا ہے اور محبوب ہے۔
<h2>اہم اصطلاحات کی فہرست</h2>
الملک: بادشاہی، سلطنت۔ سورۃ الملک کا عنوان، جو اللہ کی کائنات پر مکمل ملکیت اور اختیار کو ظاہر کرتا ہے۔
آمین: اے اللہ! اس دعا کو قبول فرما۔
توکل: اللہ پر بھروسہ اور انحصار کرنا، ساتھ ہی ضروری اسباب اختیار کرنا۔
اخلاص: نیت کی پاکیزگی۔ اعمال صرف اللہ کی رضا کے لئے کرنا، لوگوں کی تعریف یا شہرت کے لئے نہیں۔
ریا: دکھاوا۔ عبادت یا نیک عمل اس نیت سے کرنا کہ لوگ دیکھیں اور تعریف کریں۔
العزیز: زبردست، غالب۔ وہ ذات جس پر کوئی غالب نہیں آسکتا۔
الغفور: بہت زیادہ بخشنے والا۔ وہ جو بار بار گناہوں کو معاف کرتا ہے۔
الخالق: خالق۔ وہ جو ہر چیز کو وجود میں لاتا ہے۔
اللطیف: باریک بین۔ وہ جو چھوٹی سے چھوٹی چیزوں کو جانتا ہے اور نفع ایسے طریقے سے دیتا ہے جو انسان کو نظر نہ آئے۔
الحکیم: حکمت والا۔ وہ جس کے تمام کام کامل حکمت پر مبنی ہیں۔
الخبیر: پوری طرح باخبر۔ ظاہر و باطن سب سے مکمل طور پر واقف۔
صبر: برداشت، ثابت قدمی۔ آزمائشوں میں ڈٹے رہنا۔
شکر: شکرگزاری۔ اللہ کی نعمتوں کو ماننا اور اس کا شکر ادا کرنا۔
دنیا: یہ دنیاوی زندگی، جو عارضی اور فانی ہے۔
آخرت: موت کے بعد کی ابدی زندگی۔
دعا: اللہ سے مانگنا، پکارنا، دعا کرنا۔
ذکر: اللہ کا ذکر کرنا، چاہے زبان سے یا دل میں۔
سجود: سجدہ، نماز کی حالت جس میں پیشانی زمین پر رکھی جاتی ہے۔
جنت: ہمیشہ کی نعمت اور مومنین کا بدلہ۔
جہنم: کافروں اور نافرمانوں کی سزا۔
مالک الملک: بادشاہوں کا بادشاہ۔ اللہ کا ایک نام، جو اس کی مکمل بادشاہی کو ظاہر کرتا ہے۔
یا حی یا قیوم: اے ہمیشہ زندہ رہنے والے، اے سب کو قائم رکھنے والے! ایک طاقتور دعا جس میں اللہ کی ابدی زندگی اور اس کی قائم رکھنے والی قدرت کو پکارا جاتا ہے۔

اس سے پہلے کہ پانی ختم ہو جائے

سورۃ الملک کے ساتھ 7 دن کا سفر — اللہ کی بادشاہت، زندگی کے مقصد اور رحمت و عدل کے توازن کو دریافت کریں۔ ایمان کو تازہ کریں اور اللہ کی نشانیوں پر غور بڑھائیں۔