<p dir="auto">5 دنوں کا قرآن پر مبنی یہ تعلیمی منصوبہ اسکرین کی لت کی وجہ سے بے چینی، ذہنی تناؤ اور توجہ میں کمی سے متاثر افراد کے لیے ہے۔ یہ لرننگ پلان آپ کو قرآنی آیات، نبوی بصیرتوں اور دائمی اسلامی اصولوں کی روشنی میں خالق سے جڑنے، حواس کی حفاظت، اور توجہ برقرار رکھنے کی دعوت دیتا ہے۔ چاہے مسلسل اسکرولنگ نے آپ کی توجہ منتشر کر دی ہو، یہ منصوبہ آپ کو<em> لاپرواہی کے بجائے شعوری</em> اور <em>غفلت کے بجائے بیداری</em> کے ساتھ زندگی گزارنے کی ترغیب دیتا ہے۔ یاد رکھیں، آپ کا وقت ہی آپ کی زندگی ہے۔ اور یہ وقت آخرت کی تیاری کے لیے سب سے قیمتی اثاثہ ہے۔ اللہ ہمیں ان اسباق کو سیکھنے، ان پر عمل کرنے اور دوسروں تک پہنچانے کی توفیق دے۔ آمین۔</p><p dir="rtl"><strong>موضوعات:&nbsp;</strong></p><ul dir="rtl"><li dir="rtl"><p dir="rtl">اسکرین کی لت کا روحانی نقصان&nbsp;</p></li><li dir="rtl"><p dir="rtl">وقت، بصارت، سماعت اور دل کے حوالے سے جوابدہی</p></li><li dir="rtl"><p dir="rtl">ڈیجیٹل دور میں حدود، اعتدال اور توازن</p></li><li dir="rtl"><p dir="rtl">ذکر، دعا اور اللہ کی نعمتوں پر غور کے ذریعے ڈیجیٹل ڈِی ٹاکس</p></li><li dir="rtl"><p dir="rtl">اللہ کے لیے جینا ,الگورتھم کے لیے نہیں</p></li></ul><p dir="rtl">کیا آپ اپنا وقت واپس حاصل کرنا اور بے مقصد اسکرولنگ کی عادت سے نجات پانا چاہتے ہیں؟ آج ہی سے آغاز کریں، اور اپنی اسکرین کو اپنے دل و روح کی تربیت اور بھلائی کا ذریعہ بنائیں۔</p><p dir="rtl">&nbsp;ہم آپ کی رائے جاننا پسند کریں گے: <a target="_blank" rel="noopener noreferrer" href="mailto:learningplans@quran.com"><u>learningplans@quran.com</u></a></p>

<h2 dir="auto"><strong>آیاتِ قرآنی</strong></h2><blockquote dir="auto"><p dir="auto">"زمانے کی قسم ہے۔ یقینا انسان خسارے میں ہے۔ سوائے ان کے جو ایمان لائے اور انہوں نے نیک عمل کیے اور انہوں نے ایک دوسرے کو حق کی نصیحت کی اور انہوں نے باہم ایک دوسرے کو صبر کی تلقین کی۔"<br dir="auto"><br dir="auto">(قرآن 103)</p></blockquote><blockquote dir="auto"><p dir="auto">"اے اہل ایمان ! تمہیں غافل نہ کرنے پائیں تمہارے اموال اور تمہاری اولاد اللہ کی یاد سے۔ اور جو کوئی ایسا کریں گے تو وہی خسارے میں رہیں گے۔"<br dir="auto"><br dir="auto">(قرآن 63:9)</p></blockquote><h2 dir="auto"><strong>سبق اور تدبر</strong></h2><p dir="auto">ہماری زندگی کا ہر لمحہ بے حد قیمتی ہے۔ وقت ایک انمول نعمت ہونے کے ساتھ ایک بڑی آزمائش بھی ہے، کیونکہ یہ بھی مال کی طرح ایک<em> امانت</em> ہے۔ مگر افسوس، ہم مصروفیت کا دعویٰ کرتے کرتے اسی امانت کو غفلت اور بے پرواہی سے ضائع کر رہے ہیں۔ ہم گھنٹوں فضول ویڈیوز اور پوسٹس اسکرول کرنے میں گزار دیتے ہیں، اور آخر میں دل کی ویرانی، وقت کی کمی اور بے برکتی کی شکایت کرتے رہتے ہیں۔ دن ہمیں چھوٹے لگنے لگے ہیں، کیونکہ ہماری زندگیوں سے برکت اٹھ چکی ہے۔ اللہ نے ہمیں یہ نعمت اس لیے عطا کی تھی کہ ہم اسے بامقصد اور کارآمد کاموں میں صرف کر کے اپنی دنیا اور آخرت سنواریں۔ ہمارے اسلاف نے انہی چوبیس گھنٹوں میں تاریخ رقم کی، جبکہ ہم انہی لمحوں کو اسکرینوں کے پیچھے گنوا رہے ہیں۔</p><p dir="auto">سورہ العصر جس کا مطلب 'وقت یا گزرنے والا زمانہ' ہے، کامیابی کی چار شرائط بتاتی ہے: ایمان، نیک عمل، حق کی تلقین، اور صبر۔ یہ چاروں اوصاف خود بخود کسی اتفاق، غفلت یا خلا میں نہیں، بلکہ اسی دنیا میں پیدا ہوتی ہیں&nbsp; جہاں وقت پانچواں جہت ہے، جو مسلسل آگے بڑھ رہا ہے اور ہمیں بھی&nbsp; اپنے ساتھ لے جا رہا ہے۔ اسی لیے وقت کو باشعوری طور پر استعمال کرنا ضروری ہے، کیونکہ وقت صرف گزر نہیں رہا بلکہ ہمارے اعمال پر گواہی بھی دے رہا ہے۔</p><p dir="auto">ٹیکنالوجی کو بالکل چھوڑ دینا حل نہیں، بلکہ اصل توازن اس بات میں ہے کہ ہم اسے عادت بنانے کی بجائے ایک مفید آلے کے طور پر بامقصد طریقے سے استعمال کریں۔ ہم میں سے اکثر اسکرین کام کے ارادے سے کھولتے ہیں، مگر دیکھتے ہی دیکھتے کام سے ہٹ کر خود کو وقت ضائع کرنے والی تفریح میں مشغول پاتے ہیں۔</p><p dir="auto">اسلام ہمیں وقت کے معاملے میں اللہ کا تقویٰ اختیار کرنے اور روزِ قیامت اس پر جواب دہ ہونے کا سبق دیتا ہے۔ مسلسل اسکرین کے استعمال سے نہ صرف وقت کی قدر ختم ہوتی ہے بلکہ اللہ، خاندان، دوستوں اور معاشرے کے ساتھ تعلقات بھی متاثر ہوتے ہیں۔ اس کی وجہ سے ہم کسی بھی کام پر توجہ مرکوز نہیں کر پاتے اور دل ویران سا محسوس ہوتا ہے۔ آخرکار، ہم اپنی زندگی کے اصل مقصد سے غافل ہو جاتے ہیں۔</p><p dir="auto">اس سے بچنے کا پہلا قدم نقصان کو پہچاننا ہے، کیونک ہ ہر لمحہ جو اسکرین میں کھو گیا، زندگی کا ایک حصہ اپنے ساتھ لے گیا ہے۔&nbsp; اور جتنا زیادہ ہم ان لمحات کو کھوتے جاتے ہیں، اتنا ہی ہمارا دل بے مقصد ہوتا جاتا ہے۔</p><h2 dir="auto"><strong>حدیث</strong></h2><p dir="auto">نبی اکرم ﷺ نے فرمایا:<br dir="auto">"دو نعمتیں ایسی ہیں کہ اکثر لوگ ان کی قدر نہیں کرتے,صحت اور فراغت۔"<br dir="auto">(صحیح بخاری، حدیث 6412) </p><p dir="auto">ضرورت سے زیادہ اسکرین استعمال کرنا اکثر ان دونوں کو ضائع کر دیتا ہے۔</p><h2 dir="auto"><strong>عملی سرگرمی</strong></h2><ul dir="rtl"><li dir="rtl"><p dir="rtl">اسکرین ٹائم آگاہی: آپ آج ہی اپنے موبائل اور لیپ ٹاپ کا اسکرین ٹائم چیک کریں۔ دیکھیں کن 1-2 ایپس پر آپ کا سب سے زیادہ وقت ضائع ہوتا ہے۔ ان میں سے کم از کم 15 منٹ کم کریں۔ اُس وقت کو ذکر، دعا یا خاموش تدبر میں گزاریں۔</p></li></ul><h2 dir="auto"><strong>قرآنی دعا</strong></h2><p dir="auto">رَبَّنَا ظَلَمْنَا أَنفُسَنَا وَإِن لَّمْ تَغْفِرْ لَنَا وَتَرْحَمْنَا لَنَكُونَنَّ مِنَ الْخَاسِرِينَ ‎﴿٧:٢٣﴾‎</p><blockquote dir="auto"><p dir="auto">(اس پر) وہ دونوں پکار اٹھے کہ اے ہمارے رب ہم نے ظلم کیا اپنی جانوں پر اور اگر تو نے ہمیں معاف نہ فرمایا اور ہم پر رحم نہ فرمایا تو ہم تباہ ہونے والوں میں سے ہوجائیں گے۔" <br dir="auto"><br dir="auto">(قرآن 7:23)</p></blockquote><h2 dir="auto"><strong>حصن المسلم سے دعا</strong></h2><p dir="auto">اللَّهُمَّ إِنِّي أَسْأَلُكَ عِلْمًا نَافِعًا، وَرِزْقًا طَيِّبًا، وَعَمَلًا مُتَقَبَّلًا<br dir="auto">"اے اللہ!میں تجھ سے فائدہ دینے والے علم، پاک رزق، اور قبول ہونے والے عمل کا سوال کرتا ہوں۔"<br dir="auto">ابن ماجہ: 925 <br dir="auto">حصن المسلم:95</p><h2 dir="auto"><strong>تدبر کے سوالات</strong></h2><p dir="auto">اسکرین میں زیادہ دیر کھوئے رہنے کی وجہ سے میرا دل کس چیز سے محروم ہے؟ کتنے ہی قیمتی لمحے ہم نے عارضی اور بے مقصد مواد کے پیچھے ضائع کر دیے، جو ہمارے دل کو سکون اور ایمان کو تقویت بخش سکتے تھے؟ اور میں آج اس روش کو بدلنے کے لیے کیا کر سکتا ہوں؟</p>

ڈیجیٹل ڈوباؤ

<h2 dir="auto"><strong>آیاتِ قرآنی</strong></h2><blockquote dir="auto"><p dir="auto">"کہہ دیجیے کہ وہی ہے جس نے تمہیں پیدا کیا اور تمہارے لیے کان آنکھیں اور دل بنائے۔ بہت ہی کم شکر ہے جو تم لوگ کرتے ہو۔"<br dir="auto"></p><p dir="auto">(قرآن 67:23)&nbsp;</p></blockquote><blockquote dir="auto"><p dir="auto">"اور خرچ کرو اللہ کی راہ میں اور مت ڈالو اپنے آپ کو اپنے ہاتھوں ہلاکت میں اور احسان کی روش اختیار کرو یقیناً اللہ تعالیٰ محسنین کو (ان لوگوں کو جو درجۂ احسان پر فائز ہوجائیں) پسند کرتا ہے۔"<br dir="auto"><br dir="auto">(قرآن 2:195)</p></blockquote><h2 dir="auto"><strong>سبق اور تدبر</strong>&nbsp;&nbsp;&nbsp;&nbsp;&nbsp;&nbsp;&nbsp;</h2><p dir="auto">سورہ الملک (67:23) میں اللہ ہمیں یاد دلاتا ہے کہ وہی ہے جس نے ہمیں پیدا کیا اور کان، آنکھیں اور عقل دی، مگر ہم میں سے اکثر ان انمول نعمتوں کے بارے میں غافل اور ناشکرے ہیں۔ شکر کا مطلب صرف زبان سے "الحمد للہ" کہنا نہیں، بلکہ ان نعمتوں کو صحیح طریقے سے استعمال کرنا بھی ہے، جو واقعی شکر گزار ہونے کا عملی مظہر ہو۔ اپنے حواس کو کارآمد چیزوں میں لگانا، جیسے کہ قرآن کی تلاوت یا مفید علم کا حصول بھی شکرگزاری کی ایک صورت ہے۔ اس کے برعکس، صرف فضول خواہشات کو پورا کرنے اور غیر ضروری تفریح کے لیے گھنٹوں اسکرول کرنا نہ صرف وقت کا ضیاع، بلکہ اس امانت میں خیانت بھی ہے جو اللہ نے ہمیں دی ہے۔ اللہ نے جو نعمتیں ہمیں عطا کی ہیں، ان کا شعوری اور بامقصد استعمال اور اپنے اعمال کو مقصد کے مطابق ڈھالنا ہی حقیقی شکر ہے۔</p><p dir="auto">سورۃ البقرہ ہمیں اپنے ہاتھوں ہلاک ہونے کے خلاف خبردار کرتی ہے۔ وقت ضائع کرنا کوئی معمولی عمل نہیں ہے۔ اس کے نقصانات میں روح کی کمزوری، اللہ سے دُوری، اور غفلت کا بڑھنا شامل ہے۔ گزرا ہوا وقت کبھی لوٹ کر واپس نہیں آتا۔ اس کے برعکس، ہر وہ کام جو نیک ارادے سے کیا جائے، چاہے وہ اللہ کی یاد ہو، خدمتِ خلق ہو، علم کا حصول ہو یا آرام کرنا، سب بھلائی میں شمار ہوتا ہے۔ اس سے معلوم ہوتا ہے کہ ہر کام جو نیک نیت سے کیا جائے، وقت کا بہترین استعمال ہے۔</p><p dir="auto">آپ سے پوچھا جائے گا کہ آپ نے جوانی، صحت اور فارغ وقت کہاں گزارا۔ اور ہم کس طرح "صرف ایک اور ویڈیو" کے چکر میں اپنا وقت کھو دیتے ہیں۔ یہ سمجھنا بہت ضروری ہے کہ زندگی کا ہر لمحہ یا تو آپ کو اللہ کے قریب لے جا رہا ہے یا اس سے دور۔</p><h2 dir="auto"><strong>حدیث</strong></h2><p dir="auto">نبی اکرم ﷺ نے فرمایا:<br dir="auto">"قیامت کے دن کسی بندے کے دونوں پاؤں نہیں ہٹیں گے یہاں تک کہ اس سے یہ نہ پوچھ لیا جائے: اس کی عمر کے بارے میں کہ اسے کن کاموں میں ختم کیا، اور اس کے علم کے بارے میں کہ اس پر کیا عمل کیا، اور اس کے مال کے بارے میں کہ اسےکہاں سے کمایا اور کہاں خرچ کیا، اور اس کے جسم کے بارے میں کہ اسے کہاں کھپایا۔"<br dir="auto">(جامع الترمذی، حدیث 2417)</p><p dir="auto">غور کریں تو یہ تمام سوالات وقت کے گرد گھومتے ہیں۔ زندگی وقت ہے,علم حاصل کرنے میں وقت لگتا ہے,مال کمانا اور خرچ کرنا وقت مانگتا ہے,اور جسم کی محنت کو بھی وقت درکار ہے۔ وقت ایک ایسی کرنسی ہے جسے ہم بے احتیاطی سے اسکرولنگ&nbsp; پر خرچ کرتے جا رہے ہیں، جبکہ اس کا بہترین استعمال تو آخرت کی تیاری میں ہے۔</p><h2 dir="auto"><strong>عملی سرگرمی</strong></h2><ul dir="rtl"><li dir="rtl"><p dir="rtl">وقت کا محاسبہ<strong>:</strong> آج ایک گھنٹہ اسکرین سے مکمل طور پر دُور رہیں۔ اس وقت کو کسی بامقصد کام میں گزاریں، جیسے نماز، چہل قدمی یا قرآنِ کریم کی تلاوت۔ پھر دیکھیں کہ اس سرگرمی کا آپ کے دل اور توجہ پر کیا اثر پڑا۔</p></li></ul><h2 dir="auto"><strong>دعا</strong></h2><p dir="auto">"اے اللہ! میری مدد فرما کہ میں اپنا وقت ان طریقوں میں استعمال کروں جو تجھے راضی کریں۔ میری زندگی کا کوئی لمحہ غفلت میں ضائع نہ ہو،اور ہر دن کو اپنی طرف ایک قدم قریب کر دے۔"</p><h2 dir="auto"><strong>تدبر کا سوال</strong></h2><p dir="auto">اگر مجھ سے دن کے اختتام پر پوچھا جاتا کہ وقت کیسے گزارا، تو کیا میں اسے ایسے ہی غفلت سے گزارتا؟&nbsp;</p><p dir="auto">اگر مجھے یقین ہو کہ ہر دن کا حساب ہے، تو کیا یہ سوچ میری روزمرہ کی روٹین اور وقت کے استعمال کو بدل دے گی؟</p>

وقت ایک امانت ہے

<h2 dir="auto"><strong>آیاتِ قرآنی</strong></h2><blockquote dir="auto"><p dir="auto">"اورمت پیچھے پڑو اس چیز کے جس کے بارے میں تمہیں علم نہیں یقیناً سماعت بصارت اور عقل سبھی کے بارے میں باز پرس کی جائے گی۔"<br dir="auto"><br dir="auto">(قرآن 17:36)<br dir="auto"></p></blockquote><blockquote dir="auto"><p dir="auto">"(اے نبی ﷺ !) مؤمنین سے کہیے کہ وہ اپنی نگاہیں نیچی رکھا کریں اور اپنی شرمگاہوں کی حفاظت کریں یہ ان کے لیے زیادہ پاکیزہ ہے۔ یقیناً اللہ باخبر ہے اس سے جو کچھ وہ کرتے ہیں۔"<br dir="auto"><br dir="auto">(قرآن 24:30)</p></blockquote><h2 dir="auto"><strong>سبق اور تدبر</strong></h2><p dir="auto">ہمارے اردگرد ہر وہ چیز جسے ہم سنتے، دیکھتے یا محسوس کرتے ہیں، ہماری شخصیت کا حصہ بن جاتی ہے۔ آج کے دَور میں اسکرینیں بھی ہمارے ماحول کا ایک اہم جزو ہیں۔ یہ دو دروازے کھولتی ہیں: فائدہ مند علم کا بھی، مگر ساتھ ہی آزمائش، حسد، موازنہ، وقت کے ضیاع اور گناہ کا بھی۔ یاد رکھیں! انسان درست دروازے کا انتخاب تب ہی کرتا ہے جب وہ دیکھنے اور سننے جیسی نعمتوں کو امانت سمجھے۔ اللہ تعالیٰ نے ہمیں اس دنیا میں اپنی عبادت کے لیے بھیجا ہے، لہٰذا یہ نعمتیں بھی اسی مقصد کے لیے استعمال ہونی چاہییں۔</p><p dir="auto">سورۃ الإسراء (17:36) میں اللہ ہمیں یاد دلاتا ہے کہ ہم سے ان نعمتوں کے متعلق سوال ہوگا, کیا دیکھا؟ کیا سنا؟ اور دل میں کس چیز کو جگہ دی؟ اورسورۃ المنافقون (63:9) خبردار کرتی ہے کہ کوئی بھی چیز حتیٰ کہ نعمت بھی ہمیں اللہ کی یاد سے غافل نہ کرے۔ آج سب سے عام غفلت کی وجہ ڈیجیٹل آلات ہیں: اسکرینیں جو تعلقات کو بے معنی، روح کو بے چین، اور ہر اہم معاملے میں تاخیر کا سبب بنتی ہیں۔ اسکرینیں اُس وقت نفع بخش ہیں جب انہیں اعتدال سے استعمال کیا جائے، مگر ضرورت سے زیادہ انحصار ہماری صحت، سکون اور روحانیت چھین لیتا ہے اور ہمیں اندر سے بالکل کھوکھلا کر دیتا ہے۔ حضرت محمد ﷺ نے فرمایا: "جو چیز تجھے نفع دے سکتی ہے، اُس کی کوشش کر۔" (سنن ابن ماجہ، حدیث 4168)</p><p dir="auto">اللہ ہمیں خبردار کرتا ہے کہ آنکھ، کان اور دل بہت بڑی نعمتیں ہیں، مگر انہی کے بارے میں سوال بھی ہوں گے۔ کیا ہم ہر اسکرول پر محتاط رہے؟ کیا دیکھتے اور سنتے رہے؟ ان سب کا ہمارے دلوں پر کیا اثر ہوا؟ کس مواد کو ہم نے اپنی روح کی غذا بنایا؟ تاریخ گواہ ہے کہ ہم کسی بھی گناہ کو قبولیت کی نظر سے تب دیکھنا شروع کرتے ہیں جب وہ ہماری روزمرہ زندگی کا مسلسل حصہ بن جائے۔ وہ <em>فطرت</em> جو کبھی پاک ہوتی تھی، گمراہ کن خیالات کی کثرت سے بگاڑ کا شکار ہو سکتی ہے۔ لہٰذالامحدود اسکرولنگ ہمارے دور کی سب سے قابلِ قبول غفلتوں میں سے ایک ہے، اور شاید سب سے زیادہ تباہ کن بھی۔</p><p dir="auto">سورۃ النور (24:30) میں اللہ تعالیٰ مومن مردوں (اور اگلی آیت میں مومن عورتوں) کو حکم دیتا ہے کہ وہ اپنی نگاہیں نیچی رکھیں, نہ صرف بے حیائی بلکہ ہر اُس چیز سےے دُور رکھنے کے لیے جو روح کو آلودہ کرتی ہے۔ ہر ٹرینڈنگ پوسٹ اور اسٹوری کو ہماری توجہ کا مرکز نہیں بننا چاہیے۔ کیونکہ نظروں کی حفاظت صرف گناہ سے نہیں بچاتی بلکہ دل کی حفاظت بھی کرتی ہے۔ خود ہی سوچیں وہ دل جو لغوی خواہشات کا مسکن بن جائے، وہ اللہ کی یاد کا گھر کیسے بن سکتا ہے؟</p><p dir="auto">اسکرین پر گزرتا ہر لمحہ ہماری روح کی نرمی کی وجہ ہے یا سختی کی، اس لیے ہمیں اس معاملے میں احسان سے کام لینا چاہیے۔ اسکرین کے استعمال میں<em> احسان</em> سے مراد شعوری طور پر بامقصد چیزوں کو دیکھنا، سننا اور اپنے دل کی حفاظت کرنا ہے، تاکہ موبائل اسکرین آپ کی روح کو مُردہ نہ کر دے۔ اپنی نعمتوں کو بہترین انداز میں استعمال کریں، اور خود سے سوال پوچھیں: کیا یہ اسکرین مجھے میرے خالق، نماز اور فرائض کی ادائیگی میں آسانی دے رہی ہے یا دشواری؟</p><h2 dir="auto"><strong>حدیث</strong></h2><p dir="auto">نبی اکرم ﷺ نے فرمایا:<br dir="auto">"جب تم میں سے کوئی شخص کسی ایسے آدمی کو دیکھے جو مال اور شکل و صورت میں اس سے بڑھ کر ہے تو اس وقت اسے ایسے شخص کا دھیان کرنا چاہئے جو اس سے کم درجہ کا ہے۔"<br dir="auto">(صحیح بخاری,حدیث 6490 &nbsp; مسلم,حدیث 2963)</p><p dir="auto">یہ نصیحت آج کے سوشل میڈیا اور ڈیجیٹل دور کے لیے نہایت موزوں ہے۔ یہ ہمیں یاد دلاتی ہے کہ دنیا میں بے شمار لوگ ایسے بھی ہیں جن کے پاس اسکرین جیسی سہولت موجود نہیں۔ لہٰذا ہمیں اس نعمت پر شکر ادا کرنا چاہیے اور اسے غلط سمت میں استعمال کرنے سے گریز کرنا چاہیے۔</p><h2 dir="auto"><strong>عملی سرگرمی</strong></h2><ul dir="rtl"><li dir="rtl"><p dir="rtl">اپنی فیڈ فلٹر کریں:&nbsp;آج اپنے سوشل میڈیا یا ویڈیو فیڈ کا جائزہ لیں۔ جو مواد آپ کو غفلت، حسد یا گناہ کی طرف لے جاتا ہے، اسے ان فالو یا میوٹ کریں۔</p></li></ul><h2 dir="auto"><strong>دعا</strong></h2><p dir="auto">"اے اللہ! میری آنکھوں کو اُن چیزوں سے محفوظ رکھ جو تجھے ناپسند ہیں، میرے کانوں کو بے فائدہ آوازوں سے بچا، اور میرے دل کو ہر اُس چیز سے پاک رکھ جو مجھے تیری یاد سے غافل کرے۔"</p><h2 dir="auto"><strong>تدبر کا سوال</strong></h2><p dir="auto">میں روزانہ اپنی آنکھوں، کانوں اور دل میں اسکرینوں کے ذریعے کیا کچھ داخل کر رہا ہوں&nbsp; اور کیا یہ مجھے اس انسان کے قریب لا رہا ہے جسے اللہ دیکھنا چاہتا ہے، یا اس سے دور کر رہا ہے؟</p>

آنکھ، کان اور دل کی حفاظت

<h2 dir="auto"><strong>آیاتِ قرآنی</strong></h2><blockquote dir="auto"><p dir="auto">"اور (اے مسلمانو !) اسی طرح تو ہم نے تمہیں ایک امت وسط بنایا ہے تاکہ تم لوگوں پر گواہ ہو اور رسول ﷺ تم پر گواہ ہو۔"<br dir="auto"><br dir="auto">(قرآن 2:143)</p></blockquote><blockquote dir="auto"><p dir="auto">"اے اہل کتاب اپنے دین میں غلو (مبالغہ) نہ کرو۔"<br dir="auto"><br dir="auto">(قرآن 4:171)</p></blockquote><h2 dir="auto"><strong>سبق اور تدبر</strong></h2><p dir="auto">اسلام ایک ایسا دین ہے جو ہر معاملے میں اعتدال سکھاتا ہے۔ یہ نہ تو ہمیں مکمل طور پر ہر طرح کی تفریح ترک کرنے کا درس دیتا ہے، اور نہ ہی ہر وقت اسکرین کے استعمال کو جائز قرار دیتا ہے۔ اسی لیے زندگی کے ہر پہلو کی طرح اسکرین کے استعمال میں بھی میانہ روی اختیار کرنا سنت ہے۔ لیکن آج ہم خود کو حد سے زیادہ اسکرین استعمال کرنے، گھنٹوں اسکرول کرنے اور ہر وقت موبائل کے سامنے مصروف پاتے ہیں۔</p><p dir="auto">سورہ البقرہ میں اس امت کو "امتِ وسط" کہا گیا ہے۔ لفظ <em>(وسطاً)</em> سے مراد صرف انصاف نہیں، بلکہ زندگی کے ہر معاملے میں اعتدال کے ساتھ چلنا ہے۔ یعنی اپنے دن کو کام، آرام، تدبر، اور لوگوں کے ساتھ تعلقات قائم کرنے میں متوازن طور پر گزارنا۔ لیکن اگر آپ محسوس کرتے ہیں کہ آپ خود کو ہر وقت سوشل میڈیا میں مصروف رکھتے ہیں اور اپنے جذبات پر قابو پانے کے لیے تفریح کا سہارا لیتے ہیں، تو یہ توازن بگڑنے کی علامت ہے۔ اگر آپ خود کو ایسی حالت میں پائیں تو قرآن کے تدبر اور تلاوت میں زیادہ وقت گزاریں۔ کسی نیک اور مخلص دوست سے مشورہ کریں کہ زندگی میں توازن کس طرح واپس لایا جا سکتا ہے۔ آخرکار، وہی دعا آپ کے لیے سب سے زیادہ نفع بخش ہوگی جواس معاملے میں آپ اخلاص کے ساتھ اللہ سے مانگیں گے۔</p><p dir="auto">اگرچہ سورۃ النساء (4:171) بنیادی طور پر اہلِ کتاب سے مخاطب ہے، لیکن اس میں ہمارے لیے بھی انتہاپسندی کے خلاف ایک واضح تنبیہ موجود ہے، یہاں تک کہ دین کے معاملے میں بھی۔ جب عبادت کے معاملے میں حد سے بڑھ جانے کو دین میں ناپسند کیا گیا ہے تو آپ خود ہی اندازہ لگائیں کہ ہمیں دنیوی معاملات میں کس قدر احتیاط برتنی چاہیے۔</p><p dir="auto">یہی وجہ ہے کہ ایک اعتدال پسند مسلمان جانتا ہے کہ کس چیز کو کتنا وقت دینا ہے۔ سنت بھی ہمیں اپنے وقت، توانائی اور توجہ کا بہترین استعمال سکھاتی ہے۔ اسکرین کی ہماری زندگی میں جگہ ضرور ہے، مگر یہ نہیں کہ دل ہر وقت اسی میں لگا رہے۔ ہمیں ٹیکنالوجی کو استعمال کر کے بہتر کام کرنے ہیں، نہ کہ اس&nbsp; کا غلام بن جانا ہے۔</p><h2 dir="auto"><strong>عملی سرگرمی</strong></h2><ul dir="rtl"><li dir="rtl"><p dir="rtl">حدود مقرر کریں: اپنے دن میں کچھ وقت ایسا رکھیں جب آپ ٹیکنالوجی سے بالکل دور رہیں (جیسے سونے سے ایک گھنٹہ پہلے یا کھانے کے دوران موبائل استعمال نہ کریں)۔ کوشش کریں کہ اس وقت کو خاموشی سے غور و فکر کرنے یا کسی بامعنی گفتگو میں گزاریں۔</p></li></ul><h2 dir="auto"><strong>دعا</strong></h2><p dir="auto">"اے اللہ! مجھے میری عادتوں میں میانہ روی اختیار کرنے والا بنا۔ میری آنکھوں، وقت، اور دل کو اس چیز میں مشغول نہ ہونے دے جو تجھ سے غافل کر دے۔"</p><h2 dir="auto"><strong>تدبر کا سوال</strong></h2><p dir="auto">میری زندگی میں اسکرین کے ساتھ متوازن تعلق کیسا ہونا چاہیے اور اس توازن کی طرف بڑھنے کے لیے میں آج کون سا چھوٹا مگر پائیدار قدم اٹھا سکتا ہوں؟</p>

توازن کی تلاش

<h2 dir="auto"><strong>آیاتِ قرآنی</strong></h2><blockquote dir="auto"><p dir="auto">"آپ ﷺ کہیے میری نماز میری قربانی میری زندگی اور میری موت اللہ ہی کے لیے ہے جو تمام جہانوں کا پروردگار ہے۔"<br dir="auto"><br dir="auto">(قرآن 6:162)</p></blockquote><blockquote dir="auto"><p dir="auto">"اور (اپنے دل میں) اپنے رب کو کثرت سے یاد کرتے رہو اور تسبیح کیا کرو شام کے وقت بھی اور صبح کے وقت بھی۔" <br dir="auto"><br dir="auto">(قرآن 3:41)</p></blockquote><h2 dir="auto"><strong>سبق اور تدبر</strong></h2><p dir="auto">آپ کو خودکار انداز میں چلنے کے لیے پیدا نہیں کیا گیا، اور نہ ہی اس لیے کہ ہر وقت موبائل سے جڑے رہیں۔ بلکہ آپ کی تخلیق کے پیچھےعظیم مقصد اللہ کا ذکر، عبادت، اور مسلسل شکر گزاری ہے۔ یاد رکھیں اسکرین روزمرہ زندگی کا ایک مفید ذریعہ ضرور ہے، مگر زندگی کا مرکز ہرگز نہیں۔</p><p dir="auto">سورۂ الانعام (6:162) زندگی کے ہر پہلو کوعبادت اور بندگی کا عمل قرار دیتی ہے۔ آپ کا کھانا، بولنا، چلنا اور کسی بھی چیز کا انتخاب عبداللہ کی طرح ہونا چاہیے۔ اور اس میں آپ کے ڈیجیٹل آلات کا استعمال بھی شامل ہے۔ سورہ آل عمران (3:41) یاد دہانی ہے کہ ہمارا وقت کبھی کبھار نہیں بلکہ مسلسل، صبح و شام اللہ کے ذکر میں صرف ہونا چاہیے۔</p><p dir="auto">آج کے اسکرین زَدہ دور میں بامقصد زندگی گزارنے کا مطلب اللہ کو ہر معاملے میں یاد رکھنا، خواہ وہ آپ کا اسکرول ہو، شیڈول ہو یا فراغت۔ ساتھ ہی اپنا اسکرین ٹائم چیک کرتے رہنا پچھتاوے نہیں بلکہ بہتری کے لیے۔ یعنی دل کی ویرانی سے روحانی یکسوئی کا سفر طے کرنا۔ اور خود سے سوال کرنا کہ<em> کیا یہ اسکرین مجھے ایسا شخص بنا رہی ہے جو اللہ کے قریب ہو یا وہ جو اس سے دُور</em>۔</p><p dir="auto">آپ کو ہر چیز ڈیلیٹ یا بالکل لاتعلقی اختیار نہیں کرنی بلکہ اپنی زندگی کی سمت پر غور کرنا ہے۔ اور اس کے لیے وقت کی حفاظت اور صحیح جگہ پر توجہ مرکوز کرنا ضروری ہے۔ تاکہ اسکرین آپ پر حاوی ہونے کی بجائے آپ کی اقدار کا مظہر ہو۔ اور آپ کی زندگی ذکر سے بھری ہو، صرف ڈیٹا سے نہیں۔</p><p dir="auto">آخر میں یہ بہت ضروری ہے کہ آپ اپنے فون کے استعمال کا ریکارڈ دیکھیں تاکہ صاف طور پر معلوم ہو سکے کہ کن ایپس پر آپ کا قیمتی وقت خرچ ہو رہا ہے۔ اُن چیزوں کی فہرست بنائیں جن کی وجہ سے آپ بے شمار نعمتوں کو پسِ پشت ڈال دیتے ہیں۔ سوچیں: کیا واقعی پانچ انچ کی اسکرین کے لیے زندگی، نئے تجربات اور عزیزوں سے تعلقات کو قربان کرنا عقل مندی ہے؟ لیکن یاد رکھیں کہ آپ دعا، محاسبے اور اللہ کے تقویٰ کے ساتھ <strong>بُری</strong> اسکرین کی عادت کو چھوڑ کر نئے سِرے سے زندگی کا آغاز کر سکتے ہیں۔ جو ایپس آپ کا وقت چھین رہی ہیں، اُن کی جگہ تعلیمی ایپس استعمال کریں۔ اور جہاں بھی ممکن ہو، کوشش کریں کہ زیادہ وقت اسکرین سے دُور رہیں۔ اللہ کے حکم سے یہ تبدیلی آپ کو وقت کی برکت بھی لوٹا دے گی اور آپ کے دل کو اُس اصل مقصد سے جوڑ دے گی جو زندگی کا محور ہے: اللہ کی اطاعت۔</p><h2 dir="auto"><strong>حدیث</strong></h2><p dir="auto">نبی اکرم ﷺ نے فرمایا:<br dir="auto">"دنیا میں اس طرح ہو جا جیسے تو مسافر یا راستہ چلنے والا ہو۔۔"<br dir="auto">(صحیح بخاری، حدیث 6416)<br dir="auto">یہ طرزِ فکر آپ کو ڈیجیٹل غفلت سے دور رہنے اور ارادی طور پر بامقصد زندگی گزارنے میں مدد دیتا ہے۔</p><h2 dir="auto"><strong>عملی سرگرمی</strong></h2><ul dir="rtl"><li dir="rtl"><p dir="rtl">ڈیجیٹل آلات کا با مقصد استعمال:آج آپ جب بھی اپنا موبائل کھولیں تو کچھ دیر رک کر کہیں: <em>"یا اللہ، اس کا استعمال میرے لیے نفع بخش بنانا، نہ کہ بیکار۔"</em>اس کا استعمال تقویٰ اور محاسبے کو ذہن میں رکھ کر کوشش کریں کہ صبح میں پہلا اور شام کو سونے سے پہلے آخری کام اللہ کی عبادت ہو، نہ کہ بے وجہ کی اسکرولنگ۔</p></li></ul><h2 dir="auto"><strong>دعا</strong></h2><p dir="auto">"یا اللہ، مجھے یہ شعور عطا فرما کہ میں اپنا وقت، اپنی آنکھیں اور اپنی توجہ صرف صحیح جگہ استعمال کروں۔ میری اسکرین مجھے تجھ سے کبھی غافل نہ کرے، اور میرا ہر کلک، ہر نظر اور ہر لفظ اس بات کے علم میں ہو کہ تو ہر چیز سے خبردار اور ہر عمل پر نگاہ رکھنے والا ہے۔"</p><h2 dir="auto"><strong>تدبر کا سوال</strong></h2><p dir="auto">میں اس ہفتے کونسی ایسی عادت اپنانے کا ارادہ رکھتا ہوں جو مجھے ڈیجیٹل غفلت سے بامقصد زندگی کی طرف بڑھنے میں مدد کرے؟</p><h2 dir="auto"><strong>اضافی حصہ: مزید عملی سرگرمیاں</strong></h2><p dir="auto"><strong>1. قبر کا تصور</strong></p><p dir="auto">کسی پُرسکون لمحے میں آنکھیں بند کرکے خود کو تاریک قبر میں لیٹا ہوا محسوس کریں۔ جہاں نہ فون ہے، نہ کوئی نوٹیفیکیشن، نہ ہی انٹرنیٹ۔ وہاں صرف خاموشی، آپ کے اعمال ، اور نامۂ اعمال ہے۔ پھر اپنے دل سے سوال کریں: کیا میں اس مقام پر یہ آرزو کروں گا کہ کاش میرے نیک اعمال زیادہ ہوتے؟ کن لمحوں کو ضائع کرنے پر مجھے سب سے زیادہ پچھتاوا ہوگا؟ اور اسی لمحۂ تدبر کو اپنی آئندہ زندگی کی ترجیحات طےکرنےکے لیے رہنمائی بنائیں۔</p><p dir="auto"><strong>2. ایک گھنٹے کا باشعور استعمال</strong></p><p dir="auto">روزانہ ایک گھنٹہ ایسے گزاریں جیسے آپ کی زندگی کا آخری گھنٹہ ہو۔ اس وقت کو سمجھ داری سے عبادت، ذکر، استغفار، کسی رشتے دار کو فون کرنے یا تدبر میں صرف کریں۔ اس دوران اسکرین کے استعمال سے گریز کریں سوائے اس کے کہ وہ مقصد پورا کرنے میں مدد دے رہی ہو۔</p><p dir="auto"><strong>3. اذکار کے یاد دہانی کارڈز</strong></p><p dir="auto">اپنے فون، کمپیوٹر، یا چارجر کے قریب چھوٹے اسٹکی نوٹس یا کارڈز لگائیں جن پر لکھا ہو: "کیا یہ واقعی میرے وقت کے قابل ہے؟"، "اسکرول سے پہلے اللہ کو یاد کرو۔" یا "تھوڑی دیر ذکر کرو۔" یہ یاد دہانیاں آپ کو مثبت عادات اپنانے میں نہایت مددگار ثابت ہوں گی۔</p><p dir="auto"><strong>4. غور و تدبر کے ساتھ قرآن کی تلاوت</strong></p><p dir="auto">اپنے اسکرین کے استعمال میں سے روزانہ ۱۰ منٹ قرآن کی تلاوت کے لیے مختص کریں۔ کسی بھی چھوٹی سورہ سے آغاز کریں اور اس کے معانی پر غور کریں۔ سورہ سے حاصل ہونے والا سبق لکھ لیں اور تدبر کریں کہ یہ کس طرح آپ کی ڈیجیٹل زندگی پر اثر ڈال سکتا ہے۔</p><h2 dir="auto"><strong>اضافی تدبری سوالات:</strong></h2><ul dir="rtl"><li dir="rtl"><p dir="rtl">میں جو کچھ اسکرین پر دیکھتا ہوں، وہ مجھے کیسا انسان بنا رہا ہے؟</p></li><li dir="rtl"><p dir="rtl">میں کتنی بار آسانی اور وقتی فرار کو اپنی ترقی اور مقصد پر ترجیح دیتا ہوں، اور یہ   میری روح پر کس طرح اثر ڈال رہا ہے؟</p></li><li dir="rtl"><p dir="rtl">کیا میں نے اللہ کے لیے وقت گزارنا بوجھ محسوس کیا، جبکہ بغیر کسی سوال کے ایک ڈیوائس کو بے حد وقت دے دیا؟&nbsp;</p></li><li dir="rtl"><p dir="rtl">کیا میں وہ زندگی گزار رہا ہوں جو آخرت میں کامیابی کا باعث بنے، یا وہ جو صرف اس دنیا میں فخر کا سامان ہے؟</p></li><li dir="rtl"><p dir="rtl">جب میں تنہائی میں فون استعمال کرتا ہوں، تو میں اپنے رب کے ساتھ ہوں یا اپنے نفس کے ساتھ؟</p></li><li dir="rtl"><p dir="rtl">اگر فرشتے ابھی میرے اسکرین ٹائم کو نوٹ کر رہے ہوں، تو کیا میں انہیں رکنے کو کہوں گا یا جاری رکھنے کو؟&nbsp;</p></li><li dir="rtl"><p dir="rtl">میرے فون کے استعمال کی رپورٹ میری اللہ سے محبت، میری ترجیحات، اور میرے اخلاص کے بارے میں کیا بتاتی ہے؟</p></li><li dir="rtl"><p dir="rtl">میرا کتنا وقت محض ردِّ عمل میں بیت جاتا ہے، اور کتنا وقت باشعوری اور ارادے کے ساتھ گزرتا ہے؟</p></li><li dir="rtl"><p dir="rtl">کیا میرے دل کا خالی پن صرف بوریت ہے، یا یہ اللہ کی یاد میں کمی کی نشانی ہے؟</p></li><li dir="rtl"><p dir="rtl">کیا میں نے خود کو یہ عادت ڈال لی ہے کہ پریشانی، تنہائی اور تھکاوٹ کے وقت اللہ کی طرف رجوع کرنے کے بجائے خود کو اسکرین میں مصروف کر لوں؟</p></li></ul><p dir="auto"></p>

اختتامی تدبر اور آئندہ کے اقدامات

<p dir="auto">قرآنی تعلیمات پر مبنی یہ پانچ دن کا تعلیمی پروگرام آپ کو اسکرین کی لت سے نجات اور روحانی یکسوئی حاصل کرنے میں مدد دیتا ہے۔ اس کے ذریعے آپ زیادہ متوجہ ہو کر اسلامی مقصد کے تحت زندگی گزار سکتے ہیں۔</p>